ہماری خدمات، ایک نظر میں

شفیق الامہ مولانا ڈاکٹر قاسم محمود ایک غیرروایتی فکر رکھنے والے عالم دین ہیں، آپ ممتاز دینی ادارے جامعہ دار العلوم کراچی کے فاضل اور شیخ الاسلام مفتی تقی عثمانی کے شاگرد ہیں۔ آپ کے والد وقت کے بڑے عالم دین حضرت مولانا مفتی محمد مظفرالدین تھے، جنہوں نے 1975 میں جامعہ اسلامیہ مخزن العلوم کراچی کی بنیاد رکھی، جس کے بعد یہ ادارہ دیکھتے ہی دیکھتے ملک کا ایک معروف دینی تعلیمی مرکز بن گیا۔ 2007 میں حضرت مفتی صاحب کی رحلت تک یہ ادارہ نہ صرف دینی تعلیم و تربیت بلکہ سیاست و سماج اور فلاح و بہبود عامہ کے ایک بڑے مرکز میں ڈھل چکا تھا۔

والد محترم کی وفات کے بعد حضرت مولانا ڈاکٹر قاسم محمود نے جامعہ اسلامیہ مخزن العلوم کراچی، مدرسہ تعلیم القرآن میٹروول سمیت کراچی اور الائی میں ان تمام اداروں کا نظم و نسق سنبھالا جو آپ کے والد محترم نے قائم کیے تھے۔ مولانا ڈاکٹر قاسم محمود نے اپنے والد کے چھوڑے ہوئے مشن کو اپنے وژن، بصیرت، حکمت اور تدبر سے آگے بڑھایا اور خدمات کا دائرہ وسیع کردیا۔ آج الحمدللہ مولانا ڈاکٹر قاسم محمود کے زیرقیادت و سرپرستی ملک بھر میں دینی و عصری تعلیم، اسکلز ڈیوپلمنٹ، فلاح عامہ اور ہیلتھ جیسے شعبوں میں تیس سے زائد مراکز انسانی خدمت کے فرائض انجام دے رہے ہیں۔ آئیے ذرا ان اداروں کی خدمات کی ایک جھلک دیکھ لیں۔

جامعہ اسلامیہ مخزن العلوم بنارس کراچی
جیسا کہ بتایا گیا یہ ادارہ ستر کی دہائی میں ڈاکٹر قاسم محمود کے والد گرامی حضرت اقدس مولانا مفتی محمد مظفر الدین نے قائم کیا۔ اپنے قیام سے 2021 تک اس ادارے سے ہزاروں افراد درس نظامی کے زیور سے آراستہ ہوکر نکلے اور آج وہ ملک و بیرون ملک دین و ملت کی گوناگوں خدمات انجام دے رہے ہیں۔
2021 میں ادارے نے بزرگوں سے وسیع تر مشاورت کے بعد اپنے نظام تعلیم پر نظرثانی کی اور ایک نئے عزم، نئے نظم اور نئے وژن کے ساتھ تعلیم و تربیت کا آغاز کیا، جس کے بعد سے الحمد للہ جامعہ اسلامیہ مخزن العلوم میں درج ذیل اہم شعبے بڑی عمدگی کے ساتھ خدمات انجام دے رہے ہیں:

حفافظ ایجوکیشن سسٹم
اس سسٹم کے تحت حفاظ بچوں کو چار سال کے اندر اس انداز میں میٹرک کروائی جاتی ہے کہ اس دوران بچے عربی اور انگلش زبان میں بنیادی مہارت حاصل کرلیتے ہیں۔ ہمارے اس سسٹم میں عربی صرف و نحو، قرآن مجید سے اجرا، عربی جرائد و رسائل کا مطالعہ اور انگریزی گرامر و کنورسیشن پر خصوصی فوکس کیا جاتا ہے۔

القاسم اسکول
اس اسکول کے تحت بچوں کی پرائمری ایجوکیشن پر توجہ دی جاتی ہے۔ اس کے تحت بچے تین گریڈز میں پرائمری کی استعداد حاصل کرتے ہیں۔ یہ اسکول حفظ کی کلاسز کیلئے ہے۔

فاسٹ ٹریک حفظ قرآن سسٹم
یہ ہمارے ادارے کا سِگنیچر تعلیمی پروگرام ہے۔ یہ پروگرام صدر جامعہ حضرت مولانا ڈاکٹر قاسم محمود کے سچے عشق و خدمت قرآن کا عکاس اور آپ کی خصوصی لگن، توجہ، فکر و سوچ کا حاصل ہے۔ آپ نے سالہا سال کی فکرمندی کے بعد یہ نظام وضع کیا ہے۔ اس نظام کا مقصد کم سے کم مدت کے اندر بچوں کو پختہ حفظ قرآن کروانا ہے۔ اس نظام کی سب سے بڑی خوبی یہ ہے کہ یہ بچوں کی استعداد میں اضافہ کرتا ہے۔ کمزور سے کمزور استعداد کا بچہ بھی اس نظام میں آکر اعلیٰ استعداد تک پہنچ جاتا ہے۔ یہ بھی اس نظام کی خوبی ہے کہ لااُبالی بچے بھی اس نظام میں آکر اپنی دلچسپی اور جذبے سے حفظ قرآن کرنے لگتے ہیں۔ الحمد للہ فاسٹ ٹریک حفظ قرآن سسٹم کے تحت بچے چار ماہ سے لیکر سولہ ماہ کے اندر پورا قرآن مجید حفظ کرسکتے ہیں۔

المظفر کمپیوٹر لیب
جامعہ اسلامیہ مخزن العلوم بچوں کو دینی تعلیم کے ساتھ اسکلز بھی سکھانے پر یقین رکھتا ہے، تاکہ بچے نصابی تعلیم کے ساتھ ہنر مند بھی بنیں، اس مقصد کیلئے کمپیوٹر لیب قائم کیا گیا ہے جس میں بچوں کو کمپیوٹر کے تمام کورسز کروائے جاتے ہیں۔

لینگویج انسٹیٹیوٹ
جامعہ اسلامیہ مخزن العلوم میں قائم اس شعبے میں عربی، انگریزی اور چائنیز زبان سکھائی جاتی ہے، تمام زبانیں متعلقہ ماہرین کی سرپرستی میں سکھائی جاتی ہیں۔

مارشل آرٹ
بچوں کو پروفیشنل کراٹے اور مارشل آرٹ کی ٹریننگ کیلئے ایک پروفیشنل ٹرینر کی خدمات حاصل کی گئی ہیں، الحمد للہ جامعہ کے طلبہ وقتا فوقتا کراچی لیول کے اتھیلٹکس مقابلوں میں بھی شرکت کرتے اور نمایاں کامیابی حاصل کرکے آتے ہیں۔

فاطمہ اکیڈمی میٹروول
میٹروول کی سرزمین پر 1980 کی دہائی میں حضرت اقدس مولانا مفتی محمد مظفر الدین نے جامع مسجد فاطمہ قائم کرکے اس کے ساتھ مدرسہ تعلیم القرآن کے نام سے حفظ قرآن کے ایک معیاری ادارے کی بنیاد رکھی۔ یہ ادارہ آپ کی سرپرستی میں کراچی کی سطح پر حفظ قرآن کے معیاری ادارے کے طور پر طویل عرصے تک ٹاپ پر رہا۔
حال ہی میں مدرسہ تعلیم القرآن کے نظام و نصاب کو ری کنسٹرکٹ کرکے فاطمہ اکیڈمی میں تبدیل کیا گیا ہے، اب یہاں الحمد للہ ادارے کا سگنیچر پروگرام فاسٹ ٹریک حفظ قرآن سسٹم بہت اچھے انداز میں جاری ہے۔ اس کے علاوہ یہاں پرائمری ایجوکیشن کیلئے تین گریڈز پر مشتمل بہترین نظام قائم ہے۔
فاطمہ اکیڈمی میں بچوں کے معیاری حفظ قرآن مع ارلی اسکولنگ کے ساتھ ساتھ عملی تربیت، اعمال نبوی، اخلاق اور صحت و صفائی پر خصوصی توجہ دی جاتی ہے۔ اس مقصد کیلئے فاطمہ اکیڈمی اور جامعہ اسلامیہ مخزن العلوم میں وقتا فوقتا مختلف شعبہ ہائے زندگی سے تعلق رکھنے والے نمایاں افراد، نامور علمائے کرام اور ماہرین کے مختلف سیشن کروائے جاتے ہیں، جن سے بچوں کو تعلیم و تربیت و اصلاح کے ساتھ ہم عصر دنیا میں کامیابی کے ساتھ زندگی گزارنے کا شعور ملتا ہے۔

مدرسہ فاطمۃ الزھرا للبنات
بچیوں کی معیاری دینی تعلیم بہت ضروری ہے، تاکہ وہ زیور علم سے آراستہ ہوکر نہ صرف خود دین اور قرآن و سنت کے احکامات کا شعور حاصل کریں بلکہ آگے جاکر بطور ماں نسل نو کو دینی تہذیب کے سائے میں پروان چڑھاکر امت کو باکردار رجال کار مہیا کریں۔ الحمدللہ میٹروول کی سرزمین پر اس مقصد کیلئے مدرسہ فاطمۃ الزھرا للبنات شب و روز کوشاں ہے۔

مشتری انور ووکیشنل سینٹر
میٹروول میں مستحق خواتین، بیواؤں، یتیم بچیوں اور عام خواتین کیلئے ایک معیاری سینٹر قائم کیا گیا ہے، جس میں مکمل باپردہ ماحول میں ماہر فیمیل ٹرینرز کے ذریعے سلائی کڑھائی، مہندی، بیکنگ، دستکاری، کشیدہ کاری اور بیوٹیشن کے کورسز پڑھائے جاتے ہیں اور یہ مستحق خواتین اور بچیوں کیلئے فری ہیں۔

المرکز المظفر الاسلامی
حضرت مولانا ڈاکٹر قاسم محمود کے وژن کے مطابق یہ ادارہ ملک بھر میں مساجد و مکاتب قرآنیہ کی دیکھ بھال کرتا ہے۔ الحمد للہ اس ادارے کے تحت کراچی اور ملک بھر میں درجنوں ادارے قائم ہیں۔ یہ ادارہ نہ صرف مساجد و مکاتب کی تعمیر و مرمت میں حصہ لیتا ہے بلکہ مکاتب کا تمام نظم و نسق بھی دیکھتا ہے اور ائمہ مساجد کو کمیونٹی انگیجمنٹ کی ٹریننگ بھی دیتا ہے۔

قاسم محمود فاؤنڈیشن
اس ادارے کے تحت الحمدللہ کئی شعبوں میں پبلک ویلفیئر کی خدمات انجام دی جا رہی ہیں۔ جن میں سے چند نمایاں یہ ہیں:

سستی روٹی اسکیم

اس کے تحت کراچی میں تین تندور بنارس، میٹروول اور عابد آباد میں قائم ہیں، جہاں روزانہ دو ٹائم آدھی قیمت پر ہر خاص و عام کیلئے روٹیاں دستیاب ہوتی ہیں۔

فری دسترخوان
کراچی میں ایک مستقل دسترخوان بنارس میں قائم ہے، جہاں روزانہ ایک ٹائم معیاری کھانا بالکل مفت فراہم کیا جاتا ہے، جس سے مزدور طبقہ، بے روزگار اور غریب افراد فیضیاب ہوتے ہیں۔ اس کے علاوہ میٹروول میں جمعے کے دن مستقل فری دسترخوان لگایا جاتا ہے۔ رمضان المبارک میں الائی میں دو مقامات پر روزانہ کی بنیاد پر فری افطار دسترخوان لگائے جاتے ہیں۔

راشن
سینکڑوں رجسٹرڈ مستحق افراد اور بیواؤں کو ماہانہ راشن اور خرچہ فراہم کیا جاتا ہے۔

جہیز پروگرام
مستحق اور بالخصوص یتیم بچیوں کو رجسٹریشن اور مکمل تصدیق کے بعد شادی کے اخراجات اور جہیز کی مد میں خصوصی تعاون فراہم کیا جاتا ہے۔

فراہمی آب
اس پروگرام کے تحت ملک بھر میں جہاں جہاں ضرورت ہو، وہاں کنووں کی تعمیر کے ساتھ واٹر سپلائی اسکیموں میں حصہ لیا جاتا ہے۔ الحمدللہ اس پروگرام کے تحت پاشتو الائی ضلع بٹگرام میں لاکھوں روپے لگا کر واٹر ٹینک اور واٹرسپلائی لائن کا بندوبست کیا جا چکا ہے، جس سے ہزاروں افراد فیضیاب ہو رہے ہیں۔

ملبوسات کی فراہمی
موسم بالخصوص سردیوں میں شمالی پہاڑی علاقوں میں غریب اور مستحق افراد کیلئے سردی سے بچاؤ ایک بڑا مسئلہ بن جاتا ہے، الحمدللہ ادارے کے تحت ہر سال ان علاقوں میں ہزاروں کی تعداد میں گرم ملبوسات اور کمبل تقسیم کیے جاتے ہیں۔

مساجد کیلئے صفوں اور مکاتب کیلئے ڈیسکس کی فراہمی
الحمدللہ ہر سال درجنوں مساجد اور مکاتب قرآنیہ کیلئے صفوں، دریوں اور قرآن مجید کی تپائیوں کی تقسیم عمل میں آتی ہے۔ اس کے علاوہ ہزاروں قرآن مجید کے نسخے بھی فراہم کیے جاتے ہیں۔

ائمہ مساجد کے ساتھ خصوصی تعاون
رمضان المبارک میں ائمہ مساجد اور مدارس کے غریب مدرسین کے ساتھ خصوصی تعاون کیا جاتا ہے، تاکہ وہ اپنے بچوں کے ساتھ عید اچھے انداز میں گزارسکیں۔

قربانی کا گوشت
کراچی اور شمالی علاقہ جات میں ٹرسٹ کے تحت الحمدللہ ہر سال درجنوں وقف قربانیوں کے ذریعے سینکڑوں غریب و مستحق افراد کو قربانی کا گوشت فراہم کیا جاتا ہے۔ اس کے علاوہ ادارے کے مدرسین کو خصوصی طور پر قربانی کیلئے سالم بکرے بھی دیے جاتے ہیں تاکہ وہ اپنے بچوں کے ساتھ سکون سے قربانی کریں۔

ممتاز الحسن ٹیکنیکل سینٹر بَنہ

ضلع بٹگرام کے صدر مقام بنہ میں قائم یہ ادارہ الحمدللہ علاقے کے نوجوانوں کی ہنرکاری اور اسکلز ڈیولپمنٹ کا فرض ادا کر رہا ہے۔ اس کے تحت مختلف ٹیکنیکل اسکلز ماہر ٹرینرز کی نگرانی میں سکھائی جاتی ہیں۔

مدرسہ قاسم العلوم ڈَنہ
یہ بچوں کی ابتدائی دینی تعلیم کا معیاری ادارہ ہے جو الائی کے دور دراز مقام ڈنے میں خدمات انجام دے رہا ہے۔ یہاں بچوں کو تعلیم، یونی فارم، کتب، کھانا سب فری فراہم کیا جاتا ہے۔

القاسم اکیڈمی ڈَنہ
یہ بھی ڈنے میں قائم ادارہ ہے، یہاں الحمدللہ اس قدر معیاری تعلیم ہے کہ اسے صوبائی محکمہ تعلیم نے کمیونٹی اسکول کے طور پر ایڈاپ کردیا ہے۔

مدرسہ صغراں للبنات ڈنہ
علاقے کی بچیوں کو زیور تعلیم سے آراستہ کرنے کیلئے یہ ادارہ ڈنے میں قائم کیا گیا ہے۔ یہاں ابتدائی دینی تعلیم مکمل فری فراہم کی جاتی ہے۔

ووکیشنل سینٹر پاشتو
علاقے کی بچیوں اور خواتین کو ہنر سکھانے کیلئے یہ ادارہ قائم کیا گیا ہے، الحمدللہ اس دور افتادہ پہاڑی علاقے میں اس ادارے کے تحت بچیوں کو معیاری سلائی کڑھائی سکھائی جاتی ہے۔

اختتامیہ (ایکسٹرو)

شفیق الامہ مولانا ڈاکٹر قاسم محمود کی سرپرستی میں قائم یہ تمام مراکزِ خدمت نہ صرف جہالت کے اندھیروں کو علم کے نور سے بدل رہے ہیں، بلکہ غربت اور محرومی کے خلاف ایک خاموش مگر بھرپور جدوجہد میں مصروف ہیں۔ آئیے! ہم بھی ہاتھ بڑھائیں، ان اداروں کا ساتھ دیں اور اس کارِ خیر میں شریک ہو کر ایک خوددار اور باوقار معاشرے کی تعمیر میں اپنا کردار ادا کریں۔